खोटाङ, १ चैत (रासस) : रावाबेँसी गाउँपालिका–५, दुवेकोल र ऐसेलुखर्क गाउँपालिका–७ माक्पामा भीषण आगलागी भएको छ । जङ्गलबाट गाउँ पसेको डढेलोले अहिलेसम्म आधा दर्जन घर जलेर नष्ट भइसकेको छ ।
आगलागीबाट दुवेकोलस्थित घलेगाउँका गोपाल पाण्डे, युवराज पाण्डे, अविकेशर पाण्डे र भीम पाण्डेको घर जलिसकेको रावाबेँसी गाउँपालिकाका प्रमुख लिलानाथ निरौलाले बताए। सोही डढेलोले सिमानामा पर्ने ऐसेलुखर्क गाउँपालिका–७ माक्पाका तोमबहादुर निरौला र पहलमान निरौलाको घरसमेत जलिसकेको ऐसेलुखर्क गाउँपालिका प्रमुख विश्वनाथ निरौलाले जानकारी दिए ।
नियन्त्रणबाहिर रहेको डढेलोले अन्य घरसमेत जोखिममा परेपछि ऐसेलुखर्कबाट सेना र प्रहरी झिकाएर निभाउने प्रयास भइरहेको जनाइएको छ । शुक्रबार दिउँसो रावाबेँसी गाउँपालिका–५ दुवेकोलस्थित गढीथुम्का तथा काँसेघडेरी सामुदायिक वनबाट शुरु भएको डढेलो घलेगाउँमा छिरेपछि भीषण रुप लिएको हो ।
हावाहुरी चलिरहेका कारण डढेलो नियन्त्रण गर्न नसक्दा पूरै गाउँ असुरक्षित बनेको स्थानीयले बताएका छन् । गाउँमा फुस र खरको छानो हुनुका साथै हावाहुरी चलेका कारण घर जोगाउन मुस्किल भएको हो ।
