५ जेठ, काभ्रे ।
नेकपा (एमाले)ले हिंसाले नभई जनताको विश्वासले चुनाव जितेको एमालेका अध्यक्ष तथा पूर्व प्रधानमन्त्री केपी ओलीले बताएका छन् ।
बनेपा नगरपालिकामा एमालेले प्रमुख र उपप्रमुखमा जितेको अवसरमा गरिएको बधाई कार्यक्रमलाई आज सम्बोधन गर्दै उनले सो कुरा बताएका हुन ।
“पहिले नै हामीले किन एमालेलाई जिताएनौँ भन्ने काम हामी गरेर देखाउँछौँ ।” ओलीले भने, एमाले घातको राजनीति गर्दैन, बेइमानीको राजनीति गर्दैन भन्दै अध्यक्ष ओलीले पाँच वर्षभित्रमा एमालेले बनेपालाई ऐतिहासिक नगरका रुपमा विकसित गर्ने बताए ।
कार्यक्रममा नेकपा (एमाले)का महासचिव ईश्वर पोख्रेलले पहिलेको वडाध्यक्ष्यको जस्तो भूमिका नभई सम्पूर्ण जिम्मेवारी स्थानीय निकायमै पाइने र जनताको हातमा हुने जानकारी दिए । उनले नवनिर्वाचित पदाधिकारीले बनेपा क्षेत्रमा उल्लेखनीय कार्य गर्नुपर्ने विचार व्यक्त गरे ।
बधाई कार्यक्रममा बनेपा नगरका नवनिर्वाचित नगर प्रमुख लक्ष्मीनरसिंह बादेले आफ्नो कार्यकालको प्रमुख कार्य भनेको भ्रष्टाचार नियन्त्रण गर्नुरहेको बताए । रासस
