५ जेठ, काठमाडौँ।
काठमाडौँ महानगरपालिकाको वडा नं २ को वडाध्यक्षमा नेकपा (एमाले)का उम्मेदवार राजेन्द्रकुमार श्रेष्ठसहितको प्यानल नै विजयी भएको छ ।
केही बेरअगाडि सम्पन्न मतपरिणाममा श्रेष्ठले एक हजार ८४० मत प्राप्त गरी विजयी भएका हुन । उनका निकटतम प्रतिद्वन्द्वी नेपाली काँग्रेसका उम्मेदवार प्रमोदराज शर्माले ६८४ मत प्राप्त गरेका थिए ।
यस्तै, महिला सदस्यमा पूर्णलक्ष्मी रजक, महिला दलित सदस्यमा ईश्वरी परियार, खुला सदस्यमा पदमकाजी महर्जन र विमल गुरुङ विजयी भएको मुख्य निर्वाचन अधिकृत दीपेन्द्र अधिकारीले जानकारी दिए ।
काठमाडौँ महानगरपालिकाको वडा नं २ मा तीन हजार ४५१ मत खसेको थियो ।
चन्द्रागिरि–८ मा एमाले विजयी
यसैबीच, चन्द्रागिरि नगरपालिका वडा नं ८ मा नेकपा (एमाले) का वडाध्यक्षका उम्मेदवार सन्तोष खडकाले ७५५ मत प्राप्त गरी विजयी भएका छन ।
उनका निकटतम प्रतिद्वन्द्वी नेपाली काँग्रेसका सरोजकुमार थापाले ६८८ मत प्राप्त गरेका छन् । तीन सदस्यमा एमालेका सबिता राउत, कृष्णमाया पुर्कोटी र कमल खत्री निर्वाचित भएका छन् भने काँग्रेसका पुरुषोत्तम रिजाल विजयी भएका छन् ।
प्रमुखको मतगणनामा हालसम्म काँग्रेसका घनश्याम गिरीले आठ हजार १७१ मत प्राप्त गरी अग्रता कायम गरेका छन् भने एमालेका प्रह्लाद कार्कीले पाँच हजार ९३७ मत प्राप्त गरेका छन् ।
हालसम्म उपप्रमुखमा काँग्रेसका इन्द्रावती श्रेष्ठले छ हजार ७४६ र एमालेका लीसा नकर्मीले छ हजार ६०२ मत प्राप्त गरेको निर्वाचन कार्यालयका कम्प्युटर अधिकृत दिवस भट्टराईले जानकारी दिए।
कुल ३८ हजार ८७२ मतदाता रहेको सो नगरपालिकामा ३१ हजार ९२० मत खसेको थियो । नगरपालिकामा १५ वडा रहेकामा अहिले १० र ११ वडाको मतगणना जारी छ । रासस
