कुशल श्रेष्ठ
‘यौनबाट कसले बढि आनन्द लिन्छ? महिला या पुरुष?’
यो प्रश्नमा महिला र पुरुष दुवैको जवाफ आत्मउन्मुख हुने गर्दछ। पुरुषहरूले आफूलाई बढि आनन्द हुने दाबी गर्छन् भने महिलाहरू पनि आफैलाई बढि आनन्द हुने दाबी गर्छन्। फेरि कैयौँ यस्ता पनि हुन्छन् जसले ठ्याक्कै उल्टो दाबी गर्छन्।
शास्त्र के भन्छ? विभिन्न धर्मले पनि यो विषयमा आ-आफ्नै उत्तर दिएका छन्। यस्तै शिलशिलामा महाभारतमा सहित रोचक प्रसङ्ग पढ्नुस्
महाभारत प्रसङ्ग
जब भिष्म आफ्नो मृत्युशय्यामा प्राण त्याग्ने तरखरमा थिए, त्यतिबेला युधिष्ठिरले उनलाई एक विचित्रको प्रश्न गरे- “यौन आनन्द कसले बढि प्राप्त गर्छ? महिला या पुरुष?”
युधिष्ठिरको यस्तो असामयिक प्रश्नमा भिष्मले भने- “कसले बढि आनन्द पाउँछ भनेर भन्न त मुश्किल नै पर्छ। यसको लागि तिमीले महिला अनि पुरुष भएर दुवैको अनुभव पाएको हुनुपर्छ।”
“के त्यस्तो प्राणी पनि हुन्छ र?” भनि युधिष्ठिरले चाख मान्दै सोधेपछि भिष्मले ‘भाङ्गश्वना’को कथा सुनाउन थाले।
भाङ्गश्वना जन्मिँदा पुरुष भएर जन्मिएका थिए र उनका थुप्रै छोराहरू भए। इन्द्रदेवलाई क्रोधित बनाएपछि, इन्द्रले उनलाई स्त्रीमा परिवर्तन गरिदिए। स्त्री भएर भाङ्गश्वनाले थुप्रै छोराछोरीहरू जन्माए। उनले पुरुष र पछि महिला भएन जीवन बिताए।
उनले पुरुषले भन्दा महिलाले बढि यौन आनन्द पाउने भनि बताइको कुरा कथामा पढ्न पाइन्छ।
ग्रीक संस्कृतिको पौराणिक कथाप्रसङ्ग
ग्रीक संस्कृतिको एक ग्रन्थमा पनि यसै विषयसम्बन्धि एक कथाप्रसङ्ग उल्लिखित पाइन्छ।
एकदिन ओलम्पियनका राजा-रानी ‘ज्यूज र हीरा’को बीचमा विवाद पर्यो- “यौन आनन्द कसले बढि पाउँछ?”
यसैबीच, ‘टाइरेसियस’ नाम गरेका एक साधु बाटोमा हिँड्दै गर्दा झुक्किएर बरालिएको सर्पजोडीको पोथी सर्पलाई मार्न पुगे र श्रापको कारण महिलामा परिणत हुनुपर्यो। त्यसपछि उसले बाँकी रहेको भाले सर्पलाई पनि मार्यो भने फेरि पुरुषमै परिणत हुन सकिन्छ भनेको सुनेपछि त्यो भाले सर्पलाई पनि मारे र फलतः ऊ पुरुषमा परिणत भए। 
बहस गरिरहेका ज्यूज र हीराको बीचमा कुराको टुङ्गो नलाग्ला जस्तो भएपछि ज्यूजले टाइरेसियसलाई बोलाए र सोधे- “ल तिमी नै भन टाइरेसियस! कसले बढि आनन्द पाउँछ?”
टाइरेसियसको उत्तर थियो- “महिलाले!”
तथापी;
‘आनन्द’लाई परिभाषीत गर्नुपर्दा अलि जटिल बन्न जान्छ। किनभने मानवको कल्पनाशक्ति अनि मनोभावले यौन-आनन्दको परिभाषालाई पनि फराकिलो बनाइदिन्छ। तर यो विषय महत्वपूर्ण होइन न यथार्थ नै हो। यौन जीवनबाट सन्तुष्टि पाउन सम्बन्ध सुमधुर भएको हुनुपर्छ। आपसी समझदारी र विश्वासले सम्बन्ध सुमधुर बनाउँछ।
