१२ मंसिर,  दोलखा।

कटेरामा अवैध रुपमा राखिएको कटुवा पेस्तोल बाबुले खेलाउँदा खेलाउँदै पड्किँदा आफ्नै छोरीको मृत्यु भएको छ ।

मृत्यु हुनेमा भीनपा–७ स्थित सार्की स्वाराटोलकी दशमहिने रेश्मा चौलागाईं रहेको जिल्ला प्रहरी कार्यालय दोलखाका प्रहरी नायब उपरीक्षक बेलबहादुर पाण्डेले जानकारी दिए । घटना शुक्रबार दिउँसो करिब चार बजेर ४५ मिनेट जाँदा भए पनि हेरिरहेको टेलिभिजन पड्किएको भन्दै प्रहरीलाई बाबु रामकृष्ण चौँलागाईँले ढाँटेका थिए ।

घटनाको थप अनुसन्धान भइरहेको प्रहरीले जनाएको छ । प्रहरी नायब उपरीक्षक पाण्डेले स्थलगत अनुसन्धानका क्रममा घटनास्थलमा कटुवा पेस्तोल भेटिएको र पेस्तोल पड्किँदा बालिकाको ज्यान गएको मृतकका आफन्तले समेत स्विकारिसकेको बताए ।

पेस्तोल पड्किँदा मृतकका चौलागाईंसमेत घाइते भएका थिए । घटना हुँदा मृतकका काका राजकुमार समेतसँगै रहेको र सो पेस्तोल पनि सिंगटीमा भेटेर उनैले ल्याएको स्वीकार गरेका छन्।

यता प्रहरीले भने घटनास्थलमा गोलीको खोका नभेटिएको र हतियार अरु पनि प्रयोग हुन सक्ने भन्दै थप अनुसन्धानका लागि मृतकका बु्बा र काकालाई नियन्त्रणमा राखेको छ । मृतकका आफन्तले भने टिभी पड्किएर बालिकाको ज्यान गएको भन्दै शुक्रबार घटनाको ढाकछोप गर्ने प्रयास गरेका थिए । रासस