१३ माघ, इलाम।
नेपाली काँग्रेसको आशन्न १३औँ महाधिवेशन नजिकिँदै जाँदा इलाममा पनि चुनावी माहोल तातिँदै गएको छ । जिल्ला सभापतिका लागि पूर्वसभापति तथा महासमिति सदस्य हिमालय कर्माचार्य, होम दुलाल, भेषराज आचार्य, वर्तमान कोषाध्यक्ष डम्बर खड्का र बेनुपराज प्रसाईंले उम्मेदवारी घोषणा गरेका छन् ।
जिल्ला, क्षेत्रीय सभापति तथा विभिन्न पदमा उम्मेदवार घोषणा गरी नेता गाउँगाउँका क्रियाशील कार्यकर्तालाई आफ्नो पक्षमा पार्न लागिपरेका छन् ।
क्षेत्रीय सभापतिमा क्षेत्र नं १ मा दुर्गा बराल र मोहन श्रेष्ठको नाम चर्चामा रहेको छ । क्षेत्रीय सभापतिमा भीष्म प्रधान तथा मिलन क्षेत्रीको समेत चर्चा रहेको छ । क्षेत्र नं २ मा सभापतिका लागि वर्तमान अध्यक्ष गोविन्द गिरी, मेघप्रसाद चम्लागार्इं र तिलविक्रम सम्वाहाम्फेको नाम चर्चा छ ।
क्षेत्र नं ३ मा सभापतिका लागि नुतनदेव दुलाल, गोविन्द पौडेल, ईश्वर चिपालु, माधव बस्नेत, रमेश सुवेदी, निरोज खड्गीको नाम चर्चामा रहेको छ ।
इलाम नगरपालिकामा निर्मल राउत, होम बस्नेत र सन्दीप बुढाथोकीको नाम चर्चामा छ । सूर्याेदय नगरपालिकामा सोनामकाजी र मणि गुरुङ र देउमाई नगरपालिकामा दिलीप कार्की, कृष्णप्रसाद बराल, पुष्प आचार्य, राजेन्द्र बास्तोला र तारा ढुङ्गानाको नाम चर्चामा छ ।
यतिबेला इलामका ठूला होटलदेखि चिया पसल हुँदै गाउँदेखि चोकसम्म नेपाली काँग्रेसकै अधिवेशन र महाधिवेशनको चर्चा चलिरहेको छ । गाउँस्तरमा समेत चुनावको प्रक्रिया अघि बढेपछि चर्चा चुलिएको हो । कतिपय गाउँ तथा नगरपालिकामा बढी नै व्यक्ति आङ्काक्षी भएकाले गर्दा सभापतिमा मिलाउन जिल्ला नेतालाई धौधौ परिरहेको छ ।
पद सुरक्षित गर्न नेता गाउँगाउँमा गएर अन्तक्र्रिया र छलफलमा व्यस्त भएका छन् । काँग्रेसको १३औँ महाधिवेशन आगामी फागुन २० देखि २३ गतेसम्म राजधानी काठमाडौँमा हुँदैछ । गाउँ र नगर माघ १५ गते, क्षेत्रीय अधिवेशन माघ २२ र जिल्ला अधिवेशन माघ २५ गते सम्पन्न हुनेछ । निर्वाचन गराउन निर्वाचन अधिकृतसमेत जिल्ला आइपुगेका छन् ।
गाउँ, नगरस्तरका अधिवेशनका लागि जिल्लामा निर्वाचनको माहोल तातेको छ । अन्य गुटका कार्यकर्तालाई समेत आ–आफ्नो पक्षमा हात लिनसमेत नेता लागिपरेका छन् । जिल्लामा करिब ७०० प्रतिनिधि आएका नेपाली काँग्रेस इलामले जनाएको छ ।
गाउँ कार्यसमितिबाट खुला पाँच, क्रियाशीलताका आधारमा महिला तीन, जनजाति एक, दलित एक, अल्पसङ्ख्यक र अपाङ्गता भएकाबाट एक र सभापति एक गरेर १२ जना आउनेछन् । रासस
यो पनि पढ्नुस्।
नेपालमा भष्ट्राचार बढ्यो, भुटान अब्बल
नयाँ शक्तिको कार्य विभाजनः प्रचार–प्रसार विभाग मुमारामलाई
राष्ट्राध्यक्षको स्वागतको लागि नाङ्गा मूर्ति ढाकियो
प्रचण्डले महतोलाई भने नाका खोल्नुस्
