९ असोज, काठमाडौं ।
साढे चार लाख भुकम्प पीडितलाई पहिलो किस्ता
प्रधानमन्त्री पुष्पकमल दाहाल ‘प्रचण्ड’ले आफू प्रधानमन्त्रीमा निर्वाचित भएको पचास दिनभित्र साढे चार लाख भूकम्पपीडितले पहिलो किस्ताको राहत रकम पाएको बाएका छन् । शनिबार साँझ नेपाल टेलिभिजनको ‘सिधा कुरा प्रधानमन्त्रीसँग’ अन्तर्सम्वाद कार्यक्रममा बोल्दै प्रचण्डले अझै एक लाख बढी भूकम्प पीडितले राहत रकम पाउन बाँकी रहेको बताएका हुन् ।
भूकम्प पीडितको राहत रकम समयमै पुरा नहुँदा मलाई नमीठो लागेको बताउदै निर्देशक समितिको बैठकमा कामको समिक्षा हुने बताए । ‘समयमै प्रतिवद्धता पुरा नहुनुको गम्भीर समीक्षा हुनेछ, आवश्यक कार्वाही गरेर सरकार अगाडि बढ्छ । म प्रधानमन्त्री हुँदा ३२ हजारले राहत पाएका थिए । तर, अहिलेसम्म चार लाखभन्दा बढीले राहत पाएका छन् । यो केही पनि होइन भन्न मिल्दैन । तर, म यसमा सन्तुष्ट छैन, त्यसैले गम्भीर समीक्षा गरेर अगाडि बढिनेछ, प्रचण्डे भने ।
यो पढ्नुस्: ओली बामदेव विवाद तिब्र, बमदेवले खोले पोल
केही दिनभित्र परिणम निस्कन्छ
देशभित्र कामको चाप थियो । म भारतबाट फर्कदै गर्दा राष्ट्रसंघमा जाँदा झन् धेरै समय लाग्ने कुरामा सोच्दै थिएँ । नेपाल आउँदा मधेशी, थारु, जनजातिका प्रतिनिधिहरुले पनि अमेरिका भ्रमणमा नजान आग्रह गर्नुभयो । प्रधानमन्त्री नै जानुपर्छ भन्ने बाध्यतात्मक स्थिति पनि थिएन । त्यसैले न्यूयोर्क भ्रमण रोकेको हुँ । संविधान संशोधनको तयारीको काम अगाडि बढ्दैछ । काम प्रगतिउन्मूख छ, केही दिनभित्र सकारात्मक परिणाम निस्कन्छ । अविश्वासको दुरी घट्दै गएको छ ।
संविधान संशोधनमा हिन्दी भाषा कहाँबाट आयो ?
संविधान संशोधनमा हिन्दी भाषा वा नागरिकताको कुनै चर्चैा चलेको छैन । यस्ता भ्रामक समाचार सम्प्रेषण नै मेरो लागि अनौठो लागिरहेको छ । संविधान संशोधनमा हिन्दी भाषा र नागरिकताको विषयले प्रवेश नै पाएको छैन । यति भ्रामक कुरा गरेर सहमतिको वातावरण भाड्न सकिन्छ भन्ने कसैले सोचेको छ भने त्यो सम्भव छैन । सीमाङ्कन लगायतका विषयमा हामी समझदारीको नजिक पुगिरहेका छौं । हामीले आफ्नो अडानबाट पनि लचक भएर हेर्नुपर्छ । सबै नेताहरु लचक हुनुपर्ने बाध्यतात्मक परिस्थिति छ । दशैं अघि नै संविधान संशोधनको प्रस्ताव प्रस्तुत गर्ने सम्भावना छ ।
भारत भ्रमणको आँखा चिम्लिएर विरोध गर्ने छन
भ्रमणले दुई देशबीचको चिसोपन घटाउन मद्दत पुगेको छ । पूनर्निर्माण, हुलाकी राजमार्ग लगायतका आयोजना र साझेदारीका विषयमा भएको प्रगति राष्ट्रिय हितमा छ । यस भ्रमणमा विवाद गर्नुपर्ने कुनै कारणा छैन । तर, भारत भ्रमण भन्नेबित्तिकै विषय नै नबुझेर आँखा चिम्लेर विरोध गर्ने मानसिकता पनि हामीकहाँ छ, यसमा मेरो भन्नु केही छैन । भ्रमण राष्ट्रिय हितमा छ, यसमा कुनै भ्रम राख्न जरुरी छैन ।
भ्रष्टचारको विरुद्ध रातदिन खटिरहेको छु
जनता र राष्ट्रको पक्षमा बेथिति र भ्रष्टाचारका विरुद्ध आफूलाई समर्पित गराएर रातदिन खटिरहेको छु । यो एउटैले गरेर हुने काम होइन, यसका लागि सरकार र जनता मिलेर जान जरुरी छ । त्यसका लागि जनताको साथको अपेक्षा गरेको छु ।
संयुक्त वक्तव्य राष्ट्रको हितमा
भारत भ्रमणको क्रममा जारी संयुक्त वक्तव्य असंलग्न परराष्ट्र नीतिकै पक्षमा छ । जुनसुकै देशमा जाँदा पनि दुईपक्षीय औपचारिक वक्तव्य जारी हुन्छन् । हामीले गरिएको पनि त्यही हो । वक्तव्यको ११ नम्वर बुदामा उल्लेख गराएको कुरा पनि त्यही मात्रै हो । अहिले गरिएका सम्झौता राष्ट्रिय हितमै पक्षमा छ । यसमा भ्रम दिन जरुरी छैन । बि.सं. २००४ देखि चल्दै आएको कुटनीतिक परम्परालाई अहिले आएर प्रश्न उठाउनुको कुनै सान्दर्भिकता छैन ।
कालोबजारी रोक्न सरकार लागि परेको छ
महंगी, कृतिम अभाव, कालोबजारीले बजारमा बिसङ्गति बढाएको छ भन्ने बुझेर नै बजार अनुगमनलाई प्रभावकारी बनाइएको छ । बजार अनुगमनलाई थप व्यवस्थित गर्न सरकार लागिरहेको छ । यसका लागि बाणिज्य तथा आपूर्ति मन्त्रालयले काम गरिरहेको छ, अनुगमनको प्रक्रिया निरन्तर छ । यसलाई निरन्तर अगाडि बढाउन जोड गरिरहेको छु । जनतालाई सहज आपूर्तिको व्यवस्था गरिनेछ । यसमा सरकारले काफी काम गरेको छ । टिकट काउन्टर व्यवस्थित गर्न मन्त्री नै अनुगमनमा जाँदै हुनुहुन्छ । यातायातको टिकटको सहज व्यवस्थाका लागि काम भइरहेको छ । भोलि, पर्सीमा सुधार हुनेछ ।
साह्रे सानो चित्त बनाएर हेर्न जरुरी छैन
साह्रै सानो चित्त बनाएर हेर्न जरुरी छैन । भारत भ्रमणको क्रममा नेपालमा भइरहेको राजनीतिक प्रगतिको जानकारी गराउनु देशको हितविपरित हुँदैन । नेपालमा संविधान घोषणा ऐतिहासिक उपलब्धि हो भन्ने हामीले प्रष्ट भनेका छौं । यसमा भारतको स्वागत गराउनु धेरै महत्वपूर्ण कुरा हो । भारतले नेपालको संविधान कार्यान्वयनमा गरेको स्वागत त ठूलै उपलब्धि हो । यसलाई बुझ्न सक्नुपर्छ । संविधान हामीले घोषणा गरेको हो । कार्यान्वयन पनि हामीले गर्ने हो । यसमा सकारात्मक कुरा आएपछि हामीले उपलब्धिकै रुपमा हेर्नुपर्छ । विगतमा केही असमझदारी भएकै हो ।
मिडियाले गम्भीर समीक्षा गर्नुपर्छ
नेपालमा संविधान निर्माण गर्ने बेलामा नै प्रेस स्वतन्त्रतालाई उच्च महत्व दिएका छौं । हाम्रो संविधानले प्रेस स्वतन्त्रताको वकालत गरेको छ । सही सूचना पालना गर्ने कुरा आत्मानुशासनको कुरा हो । राज्यले नियन्त्रण गर्ने भन्दा पनि पत्रकारहरुले प्रेस आचारसंहिता आफै पालना गर्ने कुरा हो । हिन्दी भाषाको प्रचार जसरी गरियो, यो निकै कपोलकल्पित छ । यसमा मिडियाले गम्भीर समीक्षा गर्नुपर्छ । तर, यसमा नियन्त्रण गर्ने मेरो कुनै सोंच छैन । म पूर्ण प्रेस स्वतन्त्रताको पक्षमा छु ।
अब मेलम्ची आयोजनामा शंका छैन
मेलम्ची आयोजनाको काम सन्तोषजनक भएको छ । राष्ट्रिय गौरवका आयोजना समयमै सम्पन्न गर्न म अरु आयोजनाहरुको पनि नियमित अनुगमन गर्नेछु । कृष्णप्रसाद भट्टराईजीले देखेको सपना सम्मानयोग्य छ । २७ किलोमिटरमध्ये २० किलोमिटर सुरुङ सम्पन्न भएको छ, मुहानमा काम अगाडि बढिरहेको छ । अब मेलम्ची आयोजनामा शंका गर्ने ठाउँ छैन । अब निर्माणको कामले तिब्रता पाउँछ र काठमाडौंमा छिटै मेलम्चीको पानी आउनेछ । नयाँ वर्षमा कम्तिमा पनि काठमाडौंमा पानी ल्याई सक्नुपर्छ ।
मेरो विश्वास डगमगाएको छैन
नव निर्माणको प्रयासमा सरकार छ । यसमा मेरो विश्वास डगमगाएको छैन । हामीले राष्ट्रिय संकल्प गर्न जरुरी छ । साथै दातृ निकायसँग पनि हाम्रो पूनर्निर्माण र नवनिर्माण अनुकूल अनुदान र सहयोगका लागि अनुरोध गरेका छौं । सरकार यसमा गम्भीर छ । छिटै रफ्तारमा अघि बढ्नेछौं ।