८ माघ, उदयपुर । अब हुने भनिएको स्थानीय निर्वाचनको लागि सहभागी हुन र तयारी गर्नका लागि उदयपुर जिल्लामा १६ राजनीतिक दल जिल्ला निर्वाचन कार्यालय उदयपुरमा दर्ता भएका छन् । 
निर्वाचन आयोगले २४ पुससम्ममा सबै राजनीतिक दलको विवरण पेस गर्नुपर्ने निर्देशन दिएका कारण उदयपुरमा पनि सोही मितिसम्ममा १६ राजनीतिक दलले पार्टीको विवरण र जिल्ला समितिको सदस्यको नाम समेत बुझाएको कुरा जिल्ला निर्वाचन कार्यालय, उदयपुरले बताएको छ ।
यसरी जिल्लामा पार्टीको विवरण बुझाएर दर्ता भएका दलमा काँग्रेस, एमाले, माओवादी केन्द्र, राप्रपा, नेकपा (माले), सङ्घीय समाजवादी फोरम नेपाल, सद्भावना पार्टी र राष्ट्रिय जनमोर्चा नेपाल रहेका छन् । अन्यमा नयाँशक्ति पार्टी, मधेसी जनाधिकार फोरम (गणतान्त्रिक) मधेसी जनाधिकार फोरम (लोकतान्त्रिक), तमलोपा, समाजवादी जनता पार्टीले आफ्ना विवरण बुझाएर दललाई आधिकारिक रुपमा दर्ता गरेको कुरा जिल्ला निर्वाचन कार्यालय उदयपुरका प्रमुख एकबहादुर बस्नेतले बताएका छन् ।
अन्य आयोगमा दर्ता नभएका दुई दल एकीकृत नेपाल राष्ट्रवादी पार्टी र नेपाल पूर्व राष्ट्रसेवक पार्टीले समेत आफ्ना विवरण बुझाएको बस्नेतले बताए ।
