नेपाली सिने क्षेत्रमा ठूलो र सानो पर्दा दुवैमा जमेकी सीमित कलाकारमा मध्ये पर्छिन् दीपा श्री निरौला ।
त्यतिमात्र होइन उनी नेपाली सिने क्षेत्रमा पाको उमेर सम्म विवाह नगरी बस्ने सीमित कलाकारको सूचीमा पनि अग्रस्थानमै छिन् ।
नेपाली हेडलाइन्ससँग दीपाले यौन अनुभव, विवाहको चाहाना देखि कलाकारिता सम्मका विषयमा अन्तरंग कुरा खुलेर गरेकी छिन् ।
प्रस्तुत छ हेडलाइन्सका महेश चौरसिया र गोकर्ण लामिछानेले दीपासँग गरेको अन्तरंग कुराकानी :
व्यस्त दिनचर्याकाबीच व्यक्तिगत समय कसरी निकाल्नु हुन्छ ?
खासै गाह्रो हुदैन । समय मिलायो भने सवै काम सम्भव हुनेरहेछ । सार्वजनिक मान्छेको व्यक्तिगत जीवन हुदैन भन्छन् । त्यसैले कामलाई बढी प्राथमिकता दिन्छु ।
‘तितोसत्य’ सुरु भएकै झन्डै १३ वर्ष पुगिसक्यो । यसरी हप्तैपिच्छे कार्यक्रम तयार गर्नुपर्दा विषयबस्तु कसरी छान्नुहुन्छ?
राजनीतिक अवस्था अस्तव्यस्त भएको मुलुकमा सामाग्रीको अभाव नै हुदैन । कार्यक्रमको मुख्य सामाग्री नै राजनीतिक व्यंङ्गमा आधारित हुन्छ ।
राजनीति सुध्र्यो भने कन्टेन्टको अभाव होला नि त ?
म त भन्छु बरु कार्यक्रम बन्द भए होस् तर राजनीति सुध्रे हुन्थ्यो ।
‘छ एकान छ’ फिल्मले राम्रै सफलता पायो । अर्को फिल्म पनि बनाउने होला नि त ?
‘वडा नम्बर छ’ फिल्म बनाउने तयारी हुदैछ । स्क्रिप्ट लेख्ने काम भइरहेको छ ।
‘छ’ लाई नै किन छान्नु भएको हो ?
‘छ’ हाम्रो लकी नम्बर सावित भयो ।
थुप्रै नेपाली चलचित्र असफल भइरहेको सन्दर्भमा ‘छ एकान छ’ ले राम्रै व्यापार गर्यो । खासमा फिल्म चल्ने आधार के हो ?
कथाबस्तु, लोकेसन अनि प्रस्तुति ।
‘अग्निपथ’ चलचित्रबाट तपाईले ठूलो पर्दामा सुरुवात गर्नुभएको थियो । फेरि बीचमा किन हराउनु भयो ?
म आफूलाई एउटा नायिका भन्दा पनि कलाकारका रुपमा लिन्छु । उसो त नायिका हुने त हरेकलाई रहर हुन्छ तर प्रस्ताव आएका रोलहरु नै त्यति मन परेनन् । तितो सत्यमा पनि व्यस्त भइयो । बडा नम्बर छ को तयारी हुदैछ त्यसैमा देखिनेछु ।
कलाकार असफल हुनुको कारण के लाई मान्नुहुन्छ ?
अनुहार, जीउ, बोली र हाउभाउ सुहाउदो रोल मात्रै गर्नु पर्छ । तर जे पायो त्यही रोल गर्यो भने कलाकार मात्र होइन फिल्म पनि चल्दैन ।
कलाकारलाई प्रशंसा कतिको आवश्क छ ?
प्रशंसाले प्रोत्साहन गर्छ । सायद मैले दर्शकको माया र प्रशंसा नपाएको भए यहाँसम्म पुग्न सक्थिन ।
अहिलेसम्म बिहे किन गर्नु भएन ?
राम्रो केटा नै भेटिएन (लामो हाँसो) । हेर्नुस् विवाह भन्ने कुरा भाग्यमा लेखेरै आउनु पर्छ । ५५ वर्ष भएपछि राजेश दाईले अस्ति भर्खर बिहे गर्नुभयो । हतार गर्न हुदैन । भाग्यमा लेखेको बेला केटा पनि भेटिन्छ बिहे पनि हुन्छ ।
राजेश हमालले त बिहे गरिसके अब तपाईले बिहे कहिले गर्नुहुन्छ ?
अब धेरै ढिलो धेरै हुदैन । कम्तीमा दुई वर्ष भित्र म पनि बिहे गर्छु । राजेश दाई अविवाहित हुँदा बिहेको प्रश्नबाट मलाई पन्छिन सजिलो थियो । अब त झन् अप्ठयारो पो भएछ ।
राजेश हमालको बिहेले तपाई किन अप्ठयारो ?
अविवाहित संघको अध्यक्ष (राजेश हमाल) ले बिहे गरिसकेपछि बाँकी सदस्यहरुलाई अप्ठयारो हुदैन त ? दाई अध्यक्ष सम्हालिरहनु भएको थियो । बिहे कहिले गर्ने भनेर राजेश दाईलाई सोधिने प्रश्न म तिर तेर्सिएको छ । अब मैले सोध्नु पर्यो, राजेश दाई यति चाडै किन बिहे गर्नु भएको ?
यति लामो समय एक्लै जिन्दगी बिताउन गाह्रो हुदैन ?
हुदैन । म त मेडिटेशन (ध्यान) गर्छु । त्यसैले ध्यान अन्त जाँदैन । त्यसो त एक्लै बस्न त को नै चाहन्छ र तर हतार छैन । राम्रो केटा भेटे बिहे गर्छु । प्रस्तावहरु थुप्रै आए तर गतिलो भएन ।
प्रेम प्रस्ताव कतिको आउछ ?
थुप्रै आउँछ । अचेल कम भइसक्यो । सुरुमा लव लेटर लेखेर, बाटोमा भेटेर प्रेम प्रस्ताव गर्नेले हैरानै बनाउथे । ३० वर्ष उमेर कटिसकेपछि प्रेम प्रस्ताव आउन छोड्छ । केटीलाई प्रेम प्रस्ताव आएन भने त त्यो केटी नै होइन नि । प्रपोज नआउने त्यो महिला महिला होइन मैला हो ।
कस्तो केटाको खोजीमा हुनुहुन्छ ?
मलाई रुप राम्रो भन्दा मन राम्रो भएको केटा चाहिन्छ । अहिले पनि ‘भेकेन्सी ओपन’ छ ।
तपाईलाई प्रेमको अनुभव छ ?
विद्यार्थी छँदा मैले पनि मायाँ गरे । बिहे गर्ने मोडमा पुगेको थिए । तर त्यो प्रेम असफल भयो । एक पटक प्रेममा धोका पाएपछि कसैसंग माया नै बसेन ।
अनि सेक्सको अनुभव नि ?
भएन । यो नितान्त निजि कुरा हो तर मलाई सेक्सको अनुभव छैन ।
दिपकराज गिरीसंग काम गरेको दशकौं भइसक्यो । रिल लाइफमा तपाईहरु पतिपत्नि हुनुहुन्छ । वास्तविक जीवन हामी पतिपत्नि भए हुन्थ्यो जस्तो लाग्दैन ?
दिपक र मेरो जोडी परफेक्ट छ । ऊ विवाहित नभएको भए हामी बिहे गर्थ्यौं । नेपालको कानुनले पनि बहुविवाहको छूट दिएको भए म दिपकसंग बिहे गर्थे ।
अन्त्यमा केही भन्नु छ?
दर्शकले यसरी नै माया गर्दिऊन् बाँकी पुगेकै छ ।
