३ असोज, काठमाडौं ।
संविधान घोषणा हुने दिन आज राजधानीको नयाँ बानेश्वर विशेष आकर्षणमा छ । कतिपय पक्षले बन्द आयोजना गरे पनि काठमाडौँ उपत्यकाको जनजीवन सामान्य रहेको छ ।
संविधान घोषणा हुने भएपछि के घर के डेरा सडकदेखि सदनसम्म जनलहर र उत्साह देखिएको छ ।
संविधानको स्वागतमा मोटर साइकल र्याली निकाल्दै युवाहरु
बेहुलीझैँ सिँगारिएको संविधानसभा भवन र बानेश्वर क्षेत्रको सडक आसपास गरिएको साज सजावटले सर्वसाधारणलाई आकर्षित गरेको छ । काठमाडौँ उपत्यकाका सडक र मुख्य चोकहरुमा सुरक्षाकर्मीको बाक्लो उपस्थितिले पनि सर्वसाधारणमा मनोबल बढाएको छ ।
नयाँ बानेश्वरस्थित संविधानसभा भवन आसपासमा मानिसको बाक्लो उपस्थिति रहेको छ ।
संविधानसभाबाट सङ्घीय लोकतान्त्रिक गणतन्त्र नेपालकोसंविधान जारी हुन लागेको खुसियालीमा सहर तथा गाउँ, बस्ती सरसफाइ गरिएको छ ।
आफ्ना जनप्रतिनिधिद्वारा संविधान जारी हुन लागेको खुसियालीमा गाउँ, बस्ती, टोल, वडाका स्थानीयवासी आज बिहानै घर, चोक, आँगन सरसफाइमा जुटेका छन् । राजनीतिक दलका प्रतिनिधि, बुद्धिजीवी, समाजसेवी आज बिहानै हातमा कुचो, साबेल, बोरा लिएर सडकपेटीको सरसफाइमा जुटेका थिए ।
सरकार र प्रमुख राजनीतिक दलले आज र भोलि दीपावलीलगायत विजय जुलुस मनाउन आह्वान गर्दै सार्वजनिक बिदा घोषणा गरेको छ ।
सर्वसाधारण मात्र हैन व्यवसायीमा पनि उत्तिकै उत्साह छ । नयाँ बानेश्वरमा भेटिएका मानबहादुर थापाले संविधान घोषणाको उत्साहमा सहभागिता जनाउन आफूहरु जम्मा भएको बताए ।
मध्यबानेश्वरमा ग्यास व्यवसाय सञ्चालन गर्दै आएका नवराज गौतमले पसल निर्वाध रुपमा सञ्चालन भएको र आसपासका व्यवसायी मिलेर सामूहिक रुपमा संविधानको खुसियाली साटासाट गरेको बताए ।
