३ अजोस, काठमाडौं ।

निर्वाचन आयोगले स्थानीय तहको तेस्रो चरणको निर्वाचन अन्तर्गत प्रदेश नम्बर २ का ८ जिल्लाका १३६ स्थानीय तहमा हिजो भएको निर्वाचनमा ७७ प्रतिशत मतदान भएको जनाएको छ ।

प्रारम्भिक रुपमा हिजो ७३ प्रतिशत मतदान भएको जनाएको आयोगले आज ७७ प्रतिशत मतदान भएको जनाएको हो ।

निर्वाचन आयोगस्थित संयुक्त निर्वाचन सञ्चालन केन्द्र (जेइओसी)मा प्राप्त विवरण अनुसार सप्तरीमा ७६.४ प्रतिशत, सिरहामा ७७.४ प्रतिशत, धनुषामा ७३.७ प्रतिशत, महोतरीमा ७३.३ प्रतिशत, सर्लाहीमा ७६.३ प्रतिशत, रौतहटमा ८०. ४ प्रतिशत, बारामा ७९.४ प्रतिशत र पर्सामा ८०.१ प्रतिशत मतदान भएको छ ।

यसैबीच, १३६ स्थानीय तहमध्य विहान १० बजेसम्म ८९ स्थानीय तहमा मतगणना शुरु भइसकेको आयोगले जानकारी दिएको छ । बाँकी स्थानमा सम्वन्धित स्थानीय तहका राजनीतिक दलहरुसँग समन्वय गरेर मतगणना सुरु गर्ने तयारी भइरहेको आयोगको भनाई छ ।