८ साउन, काठमाडौं ।
भारत र चीनबीच भएको लिपुलेक सम्झौताको विरोधमा भन्दै नेत्र विक्रम चन्द विप्लव नेतृत्वको माओवादीले आह्वान गरेको बन्दले यतिबेला देशभरी प्रभाव परेको छ । बन्दकर्ता सडकमा नदेखिएपनि सडकमा गाडी गुडेका छैनन् भने उद्योग कलकारखाना र शिक्षण संस्था पूर्णरुपमा बन्द भएका छन् ।
फाइल तस्विर
बन्दको चौतर्फी विरोध भएपछि फेसबुक स्ट्याटस लेखेर नेपाल बन्दको बचाउ गरेका बन्दका प्रमुख आयोजक नेकपा माओवादीका महासचिव नेत्र विक्रम चन्द भने यतिबेला देशमा छैनन् । उनी त यतिबेला खाडी मुलुकको भ्रमणमा छन् ।
२ दिन अघि मात्र विप्लवले नेपाली जनतालाई दुःख दिने उद्देश्यले नभएर लिपुलेक सम्झौताबारे सरकारलाई बोल्न बाध्य पार्ने उद्देश्यले बन्द आह्वान गरिएको भन्दै उनले बन्दको बचाउ गरेका थिए ।
तर विप्लव आफू भने गत असार ३० गतेदेखि नै खाडी मुलुकमा छन् । कतारमा नेपाली जनप्रगतिशील मोर्चा कतारको पाँचौं अधिवेशनको उद्घाटन गरेका विप्लव यतिबेला भने दुवइमा छन् ।
गत महिना राजधानीमा आयोजित एक सभामा विप्लवले नेपालमाथि आँखा नलगाउन विदेशीहरुलाई चेतावनी दिएका थिए । लिपुलेक सम्झौताको विरोधमा खुल्ला मञ्चमा आयोजित पार्टीको शक्ति प्रदर्शनलाई सम्बोधन गर्दै विप्लवले ‘हाम्रो देशमा कसैले पनि आँखा नलगाओस् हामी जे पनि गर्न तयार छौं’ भनेका थिए ।