८ साउन, रौतहट।
रौतहटको चन्द्रपुरमा आज बिहान भएको सवारी दुर्घटनामा परि दुई जनाको मृत्यु भएको छ भने ६ जना भन्दा बढी घाइते भएका छन ।
बिहान साढे पाँच बजे पूर्व पश्चीम राजमार्ग अन्तर्गत चन्द्रनिगाहपुरको लमहा पुल मा काठमाण्डौ बाट जनकपुर जादै गरेको ना४ख ६२२९ नम्बरको यात्रुबाहक बस र बाराको निजगढ बाट चन्द्रपुर आउदै गरेको ना२त ३०५६ नम्बरको ट्रयाक्टर ठोक्कीदा घटनास्थलमै दुई जनाको मृत्यु भएको छ ।
मृत्यु हुनेमा निजगढ ७ का ५० वर्षिय सोम बहादुर माझी र सोही स्थान निवासी २२ वर्षिय कुल बहादुर माझी रहेका छन ।
निजगढ बाट घर छाउने टाली बोकेर आउदै गरेको ट्रयाक्टरलाई लमहा पुलमा बसले पछाडी बाट ठक्कर दिएको थियो । मृतक सोम बहादुर माझी टालीको व्यापारी रहेको र अर्का मृतक टेक बहादुर उनका सहयोगी रहेको प्रहरीले जनाएको छ ।
दुर्घटनामा गम्भीर घाइते भएका धन बहादुर माझी ट्रयाक्टर चालक हुन सक्ने प्रहरीको अनुमान रहेको छ । त्यसै गरी ट्रयाक्टर मै सवार विनेस माझी लाई थप उपचारका लागी नारायणी उपक्षेत्रीय अस्पताल वीरगंज लगिएको ईलाका प्रहरी कार्यालय चन्द्रनिगाहपुरका प्रहरी नायब उपरिक्षक नेत्रमणी गिरी ले बताए ।
दुर्घटनामा परि बसमा यात्रा गरी रहेका दिपक भण्डारी गंगा कार्की घाइते भएको ईलाका प्रहरी कार्यालय चन्द्रनिगाहपुरले जनाएको छ । घटना पछि बसका चालक फरार रहेको र दुर्घटनाको कारणका बारेमा थप अनुसन्धान भई रहेको डिएसपी गिरी ले बताए ।
