सिन्धुपाल्चोक, ३० जेठ । नेपाल कम्युनिष्ट पार्टी (नेकपा)का अध्यक्ष एवं पूर्व प्रधानमन्त्री पुष्पकमल दाहाल प्रचण्डले विनाशकारी भूकम्पमा नेपालका राजनीतिक दलहरुबीच एकता पैदा गरेको भन्दै त्यहि एकताका कारण संविधान बनेको बताएका छन् ।
सिन्धुपाल्चोक जिल्लाको बलेफी गाउँपालिका–६ माङ्खामा बिहीवार आयोजित श्री कूपकन्या माध्यमिक विद्यालयको नवनिर्मित भवन उद्घाटन गर्दै प्रचण्डले भने, ‘हाम्रो युद्धले नेपालमा शान्ति जन्मायो । युद्धमा सहभागीलाई थाहा हुन्छ, युद्धको पीडा के हुन्छ र शान्तिको महत्व कति हुन्छ भन्ने । भूकम्पले नेताहरुको अहंकार तोड्यो र सबै जनताको सेवामा एकजुट भए । सोही एकताका कारण संविधान निर्माण सम्पन्न भयो ।’
उनले आफू प्रतिपक्षमा रहेपनि विनासकारी भूकम्पमा सबै दलहरुलाई राहत र उद्दारमा सहभागी हुन आव्हान गरेको स्मरण गरे । नकारात्मक कुरालाई सकारात्मक कुरामा रुपान्तरण गर्न सकिने यो एक उदाहरण भएको उनको भनाई थियो । प्रचण्डले भने, ‘समृद्धिका लागि हामीले छिमेकी र अन्तर्राष्ट्रिय समुदायसँग सन्तुलित सम्बन्धको वातावरण बनाएर नेपाललाई नयाँ युगतिर लैजानुपर्ने आवश्यकता छ । त्यो कामको सुरुवात भई नै सकेको छ ।’
उनले भूकम्पको समयमा आउँदा गाउँमा पीडा देखेको स्मरण गर्दै अहिले सबैमा प्रसन्नता, जोस र उमङ्ग आफूले पाएको पनि बताए । अध्यक्ष प्रचण्डले सिन्धुपाल्चोकवासीको विकास र समृद्धिमा सधैं आफ्नो साथ र सहयोग रहने प्रतिवद्धता पनि व्यक्त गरे । नेपालमा राजनीतिक स्थायीत्व मूलभूत रुपमा प्राप्त भईसकेको बताउँदै अब आर्थिक समृद्धिको नयाँ युगतिर देशलाई लिएर जानुपर्नेमा जोड दिए ।
उनले भने, ‘नीजि क्षेत्र र सार्वजनिक क्षेत्रको सहयोग विना अहिलेको २१औं शताब्दीमा विकासलाई गति दिन सम्भव छैन ।’ अध्यक्ष प्रचण्डले तातोपानी नाका जनताका लागि जसरी खुल्नु पथ्र्यो त्यसरी खुल्न अझै बाँकी रहेको बताउँँदै त्यसका लागि अझै पहल गर्ने प्रतिवद्धता व्यक्त गरे ।
