कृष्ण आचार्य
भरतपुर, १६ चैत । गैँडाकोट नगरपालिका–७ का मनहरि सापकोटाले सङ्घर्षको पापड बेल्नसम्म बेलेका छन । विभिन्न क्षेत्रमा काम गर्दा खाएको ठक्करको अनुभव उनको मनमा ताजै छ । दिनभरी काम गरेर पनि घरखर्चसम्म चलाउन धौधौ हुने उनलाई मकैको व्यापार आम्दानी अपार सिद्ध भएको छ ।
पसिनाको कमाइ खानुको मज्जा उनलाई मात्रै थाहा छ । कामको पूजा गर्ने उनले पूर्वपश्चिम राजमार्गको गैँडाकोटमा ओहोरदोहोर गर्ने गाडीका यात्रुलाई हरियो मकै बेच्छन् । नवलपुरको गैँडाकोट–८ थुम्सी नजिकै हरियो र पोलेर मकैं बेच्ने उनीजस्ता ८० स्थानीयवासी छन् । एकै जनाले मकै बेचर मासिक रु ३५ हजारदेखि ४० हजारसम्म कमाउने गरेका छन् ।
सापकोटाले विगत पाँच वर्षदेखि सोही ठाउँमा बसेर मकैं बेच्दै आएका छन । पहिला आफू मात्रै आएर मकै बेच्दै आएका मनहरिले पछिल्लो समय श्रीमती कमला सापकोटालाई पनिसँगै लिएर मकै बेच्ने थालेका छन । दुबै मिलेर व्यापार गर्दा मासिक रु ८० हजारसम्म कमाइ हुनेगरेको उनले बताए ।
सो क्षेत्रमा उनी जस्तै मकै बेच्ने छ दम्पती छन् । उनीहरुको दैनिकी पूर्व–पश्चिम राजमार्गमा गुड्ने सवारी साधानमा आउने यात्रुलाई मकै बेच्नु हो । प्लास्टिकमा पोको पारेको मकै बेच्न उनीहरु तछाडमछाड गरेर लाग्ने गरेका छन् ।
करीब पाँच सय मिटर क्षेत्रमा यस्तो दृश्य देख्न सकिन्छ । एक जनाले दिनमा १५० देखी २०० घोगासम्म मकैं बेच्ने गरेको मनहरिले सुनाए । पोलेको मकै प्रतिवटा रु २० मा बेच्ने गरिन्छ । दश घोगा मकैलाई रु १०० मा बेच्ने गरिएको छ । उनीहरुले आफ्नै खेतबारीमा दुई सिजन मकै लगाउने गरेका छन । आफूसँग मकै नभएको बेलामा अन्यक्षेत्रबाट खरीद गरेर भए पनि मकै बेच्ने गरेको मनहरिले सुनाए ।
“बाहिरबाट मकैं खरीद गरेर बेच्दा नाफा कम हुन्छ, तर आफ्नै बारीको मकै ल्याउँदा शतप्रतिशत नै नाफा हुन्छ”, मनहरिले भने, “मकैं बेचेर गरेको आम्दानीले घरपरिवार चलाउन सहज भएको छ ।”
गैँडाकोट–७ कै ईन्द्रराज कँडेलले दैनिक रु एक हजारदेखि एक हजार ५०० सम्म फाइदा हुने गरेको बताए । आफ्नो तीन कठ्ठा जमीनमा लगाएको मकैले सोचेभन्दा धेरै फाइदा दिइएको उनले बताए । छ वर्षअघि लागेको यस पेसाबाट निकै सन्तुष्टी मिलेको उनी बताउछन् । “यात्रु आफै गाडी रोकेर मकै किन्छन्”, उनले भने’ “यसले गर्दा पनि पेशाप्रति थप चासो थपिएको छ ।”
गैँडाकोट–७ कै देवप्रसाद सापकोटाले पनि श्रीमतीसँगै दैनिक मकै बेच्न राजमार्गमा आउने गरेका छन । उनीहरु दुबै जनाले दिनमा ५०० घोगा मकै बेच्ने गरेको सुनाए । दुबै जनाले मकै बेच्दा मासिक रु ८० हजारसम्म फाइदा हुने गरेको उनले बताए । शुरुवातमा चार÷पाँच जना भएर मकै बेच्ने गरेकामा अहिले दर्जनौं भइसकेका छन् ।
व्यापार राम्रो भएकाले सङ्ख्या बढेको उनले बताए । सङ्ख्या बढे पनि व्यापारमा कुनै कमी नआएको सापकोटाले बताए । नगरपालिकाले राजमार्गमा बसेर मकै बेच्दा दुर्घटना हुनसक्ने भन्दै सचेत हुन आग्रह गरेको छ । नगरपालिकाले मकै बेच्ने ठाउँको सरसफाइमा ध्यान दिन र तछाडमछाड नगरी व्यवस्थित रुपमा व्यापार गर्न आग्रह गरको नगरप्रमुख छत्रराज पौडेलले बताए । उनले भने’, “आफ्नै ठाउँमा आत्मनिर्भर बन्नेगरी व्यापार गर्नु राम्रो हो, तर व्यवस्थित हुनुपर्छ ।” रासस
