असार १७, २०७३– सहमतिको सरकारबारे बहस चल्दै गर्दा त्यसका लागि कांग्रेसले माओवादी केन्द्रको निर्णय पर्खने बताएको छ । यसअघि कांग्रेससँगकै छलफलपछि वैशाख २२ मा माओवादी अध्यक्ष पुष्पकमल दाहालले आफ्नो दलको नेतृत्वमा सरकार बनाउने निर्णय गरे पनि भोलिपल्ट निर्णय फिर्ता लिएका कारण कांग्रेस ढुक्क हुन सकेको छैन ।
कतिपयले कांग्रेस र माओवादी केन्द्रबीच ओली सरकार गिराउनेबारे एक मत बने पनि त्यसपछि बन्ने सरकारबारे मतभेद हुन सक्ने आँकलन गर्दैगर्दा माओवादी पक्ष भने आपसमा शंका गर्नुपर्ने कुनै अवस्था नभएको दाबी गर्छ ।
उच्च स्रोतका अनुसार कांग्रेस सभापति शेरबहादुर देउवाले यसअघि नै दाहाललाई प्रधानमन्त्री बनाउने बचन दिइसकेका छन् । देउवाले दाहालसँग पहिले केपी ओली सरकारबाट आफ्ना मन्त्री फिर्ता गराउन आग्रह गरेको बुझिएको छ ।
यसअघि दाहालले नयाँ सरकार निर्माणका लागि वक्तव्य जारी गरे पनि उनको निर्णयमा माओवादीकै मन्त्रीहरुले असहमति राखेपछि मतभेद व्यवस्थापन गर्न उनलाई कठिन परेको थियो । जसका कारण ओली सरकार गिराउने निर्णय गरेको २४ घण्टा नबित्दै उनी पछि हटेका थिए । दाहालको यही निर्णयका कारण कांग्रेसको माओवादीप्रति आशंका छ । सरकार परिवर्तनलाई एमालेसँग भएको ९ बूँदे सहमति कार्यन्वयन गर्ने रणनीतिक योजनामा लागेको हो कि भन्ने आशंका कांग्रेसले गरेको छ । ‘सरकारबाट हटेर आए भने हामी खुला छलफल गर्न तयार छौ’ कांग्रेस उच्च स्रोतले भन्यो,‘सरकार नछाडेसम्म विश्वास गर्न सकिने आधार देखिन्न ।’ आजको कान्तिपुर दैनिकमा खबर छ।