१९ कात्तिक , काठमाडौं।
नेपालमा संविधान संसोधन र अख्तियार प्रमुख लोकमानसिंह कार्कीमाथि लागेको महाअभियोगबारे के हुने भन्ने प्रष्ट नहुँदै गर्दा सबैभन्दा ठूलो दल कांग्रेसका सभापति शेरबहादुर देउवा भारत प्रस्थान गरेका छन् ।
भारतको सत्तारुढ दल भारतीय जनता पार्टीको थिंक ट्यांक अर्थात बुद्धिजिवीहरुको संस्था इण्डिया फाउन्डेसनको कार्यक्रममा सहभागी हुन देउवा आज बिहान काठमाडौंबाट दिल्ली हुँदै गोवा जान लागेका हुन् । देउवासँग कुनै पनि नेता भ्रमणमा सहभागी हुने छैनन् । उनका साथ पत्नी आरजुमात्र भ्रमण टोलीमा सहभागी हुनेछिन् ।
गोवाको कार्यक्रममा प्रमुख वक्ताको रुपमा सम्बोधन गरेपछि देउवा भोलि बिहान दिल्ली फर्किनेछन् । दिल्ली फर्किएपछि भारतीय प्रधानमन्त्री नरेन्द्र मोदी, कांग्रेस आइ अध्यक्ष सोनिया गान्धीसहित उच्च राजनीतिक नेतालाई भेट्नेछन् । यी भेटमा नेपालको पछिल्लो राजनीतिक अवस्थाबारे हुने कुराकानीलाई सबैभन्दा महत्वको मानिएको छ ।
आइतबार देउवाले जवाहरलाल नेहरू विश्वविद्यालयमा हुने एक कार्यक्रममा सहभागिता जनाउनेछन् ।
देउवा ५ दिने भ्रमण सकाएर कात्तिक २३ गते १२ बजे नेपाल फर्किनेछन् । नेपालमा महत्वपूर्ण मुद्दामा राजनीतिक सहमति नजुटिरहेका बेला सबैभन्दा ठूलो दलका प्रमुख नेताले भारतको भ्रमण गर्नुलाई महत्वका साथ हेरिएको छ ।
अझै लोकमानका विषयमा कांग्रेसले कुनै निर्णय नगरी पहिले भारत जानुलाई पनि अर्थपूर्ण रुपमा हेरिएको छ । लोकमान नियुक्तिको बेला भारतको अप्रत्यक्ष भूमिका रहेको चर्चा राजनीतिक वृत्तमा चलिरहँदा उनलाई हटाउनबेलामा पनि कांग्रेस अलमलिनु र यही बेला देउवा भारतमा जानुले आशंकालाई बल पुगेको बताइन्छ ।
