११ असार, नयाँ दिल्ली । भारतीय प्रधानमन्त्री नरेन्द्र मोदी पोर्चुगल, संयुक्त राज्य अमेरिका र नेदरल्याण्डको त्रिदेशीय चारदिने भ्रमणका लागि शनिबार नयाँ दिल्लीबाट त्यसतर्फ प्रस्थान गरेका छन । भ्रमणका क्रममा सम्वन्धित देशको नेतृत्वसँग द्विपक्षीय सम्वन्ध मजबुत पार्ने बिषयमा छलफल गर्ने छन ।
मोदीको भ्रमण अमेरिकी राष्ट्रपति डोनाल्ड ट्रम्पसँग पहिलो भेट र अमेरिकी नयाँ नेतृत्वसँग भारतको सम्वन्धका कारण विशेष महत्वकासाथ हेरिएको छ । मोदी र ट्रम्पको यही जुन २६ मा वासिङ्टनमा भेटवार्ता हुने कार्यक्रम रहेको छ ।
चार–दिन लामो भ्रमणका लागि छुट्नुभन्दा पहिले प्रधानमन्त्री मोदीले आफूले राष्ट्रपति ट्रम्पसँग गहिराइमा विचारको आदानप्रदान गर्ने बताएका छन ।
मोदीले ट्वीटमार्फत बताएका छन, “मेरो अमेरिका भ्रमण वासिङ्टन र दिल्लीवीचको सम्वन्धलाई थप मजबुत पार्ने बिषयमा केद्रित रहने छ ।”
भारत र अमेरिकावीचको मजबुत सम्बन्धले भारत र समग्र विश्वलाई लाभ हुने, फेसबुकमा पोष्ट गरिएको सन्देशमा भारतको जुन २५ र २६ मा हुने दुई दिने अमेरिकी भ्रमण अमेरिकी राष्ट्रपति ट्रम्पको निमन्त्रणमा हुन लागेको बताइएको छ ।
अमेरिका बसाईमा भारतीय प्रधानमन्त्री मोदीले राष्ट्रपति ट्रम्प, उनको मन्त्रीपषिद्का सदस्य लगायत महत्वपूर्ण अमेरिकी उच्च अधिकारीसँग पनि भेट्ने कार्यक्रम रहेको छ ।
भ्रमणको पहिलो दिन प्रधानमन्त्री मोदी पोर्चुगलका आफ्ना समकक्षी एन्टोनियो कोष्टासँगको भेटका लागि छुट्टाएका छन । पोर्चुगलको भ्रमणमा भारतको पोर्चुगलसँग केही पहिले भएको संयुक्त पहल र निर्णयबारे पुनरावोलकनका लागि छुट्टाइएको, प्रधानमन्त्री मोदीले बताए ।
पोर्चुगलबाट मोदी सिधै अमेरिका जानेछन भने फर्किनेक्रममा यही जुन २७ मा डच प्रधानमन्त्री मार्क रुटका साथै नरेश विलियम अलेक्जेन्डर र रानी म्याक्सिमासँग पनि भेटवार्ता गर्नेछन । पिटीआई
