२४ पुस, काठमाडौँ।
विज्ञान तथा प्रविधिमन्त्री शिवलाल थापा, भूमिसुधार तथा व्यवस्था राज्यमन्त्री विक्रमबहादुर थापा र स्वास्थ्य राज्यमन्त्री मोहम्मद मुस्ताक आलमले आ–आफ्नो सम्पत्ति विवरण सार्वजनिक गरेका छन् ।
विज्ञान तथा प्रविधिमन्त्री शिवलाल थापा
उनीहरुले अख्तियार दुरुपयोग अनुसन्धान आयोगले निर्दिष्ट गरेको सम्पत्ति विवरण फाराम भरी सूचना तथा सञ्चार प्रविधि मन्त्रालयमार्फत सार्वजनिक गरेका हुन ।
स्थायी लेखा नं १०३९०९०२२ रहेका मन्त्री शिवलाल थापाले विभिन्न बैंक, वित्तीय तथा सहकारी संस्थामा रु २७ हजार ५०० शिक्षक निवृत्तिभरणबाट बचत गरेको उल्लेख गरेका छन् ।
उनले तनहुँ जिल्लाको भिरकोट, शिवपुर र व्यास नगरपालिकामा करिब एक रोपनी छ आना जग्गा श्रीमती इन्दिरा थापा र आफ्नो नाममा शिक्षण पेसा र पुख्र्यौली सम्पत्तिबाट आर्जन गरेको विवरण उल्लेख गरेका छन् ।
भूमिसुधार तथा व्यवस्था राज्यमन्त्री विक्रमबहादुर थापा
त्यसैगरी, स्थायी लेखा नं १०३९०९०५१ रहेका भूमिसुधार तथा व्यवस्था राज्यमन्त्री थापाले बैंक, वित्तीय तथा सहकारी संस्थामा रु पाँच लाख नगद, ३० तोला सुन र १२५ तोला चाँदीका गरगहना पैतृक सम्पत्ति र स्वआर्जनबाट बचत गरेको उल्लेख गरेका छन् ।
उनले काठमाडौँ जिल्लाका विभिन्न स्थानमा करिब ४० रोपनी जग्गाभित्र दुई, तीन र चार तलाका तीनवटा घर, मोटरसाइकल दुई, एक स्यान्ट्रो गाडी पैतृक र स्वआर्जनबाट जोडेको उल्लेख गरेका छन् ।
त्यसैगरी, स्वास्थ्य राज्यमन्त्री आलमले काठमाडौँको स्युचाटारमा चार आना र रौतहटमा १० बिगाहा तीन कट्ठा जमिन पुख्र्यौली सम्पत्तिका रुपमा रहेको उल्लेख गर्नु भएको छ । उहाँसँग चार भैँसी, दुई गाई, छ गोरु र ११ बाख्रा चौपायाका साथै २० तोला सुन, ५० तोला चाँदी रहेका छन् । विभिन्न बैंक तथा वित्तीय संस्थामा रु २० लाख नगद कृषि पेसाबाट आर्जन गरेको पनि उनले उल्लेख गरेका छन् । रासस
