११ भदौ, उदयपुर । उदयपुरको हर्देनी गाविस–८ स्थित बसेरी गाउँमा अहिले खानेपानीको हाहाकार हुन थालेको छ ।
स्थानीय अँधेरी तथा लालकु खोलाको मुहानको पानी धारा जडान गरी वितरण हुँदै आएको भए तापनि अहिले पानीको मुहान सुकेपछि त्यहाँ खानेपानीको हाहाकार हुन थालेको हो ।
भदौ महिना सुरु भएसँगै अहिले मुहान सबै सुक्न थालेपछि धारामा एक थोपा पनि पानी आउन छाडेको हर्देनी–८ का ललिताकुमारी पौडेलले बताए ।
पानी अभाव हुन थालेपछि करिब ७० घर गाउँले अहिले डेढ घन्टा पर मयङखु खोलाको पानी बोकेर खान बाध्य हुनु परेको स्थानीय कमलप्रसाद पौडेलको भनाइ रहेको छ ।
धारामा पानी आउन छाडेपछि हर्देनीको उपस्वास्थ्य चौकीमा बिरामीलाई औषधि खुवाउने पानीको समेत अभाव भएको उपस्वास्थ्य चौकीका इन्चार्ज अहेब पर्शुराम रेग्मीले बताए ।
यता उच्च मावि हर्देनीका विद्यालयमा अध्ययन गर्ने विद्यार्थी तथा शिक्षकले समेत पानीको अभाव भोग्नुपरेको विद्यालयका शिक्षक कृष्ण खड्काले बताए ।
बसेरीका खगेन्द्र राउत भन्नुहुन्छ, “धारा छ पानी छैन, पानी लिन डेढ घण्टा टाढा जान पर्ने बाध्यता रहेको छ, अहिले गाउँलेले सबैभन्दा बढी पिउने पानीको कष्ट भोग्नु परेको छ ।”
छिमेकी गाविस मयङखुको खोलाबाट वैकल्पिक खानेपानीको व्यवस्था गर्न सकिने भए तापनि यसतर्फ सम्बन्धित निकायको ध्यान जान नसक्दा हर्देनी–८ का जनताले पिउने पानीको समस्या भोग्नुपरेको गाउँलेको गुनासो बढ्दै जान थालेको पाइन्छ । रासस