२१ पुस, एजेन्सी ।
भारतका चर्चित प्राज्ञ श्रीपल सबनिशले भारतीय प्रधानमन्त्री नरेन्द्र मोदी पाकिस्तानको लाहौरमा गोली लागेर मारिन सक्थे भन्ने टिप्पणी गरेपछि विवाद शुरु भएको छ ।
मराठी साहित्य सम्मेलनमा बोल्दै चर्चित प्राज्ञ सबनिशले मोदीले अकस्मात गरेको पाकिस्तान भ्रमणप्रति आपत्ति जनाउँदै उनी लाहौरमा गोली लागेर मारिन सक्ने बताएका हुन् ।
मोदीको दल भारतीय जनता पार्टीका महासचिव राम माधवले भने सबनिशले राजनीतिको विषयमा भन्दा बढी साहित्यको विषयमा बोल्दा राम्रो हुने प्रतिक्रिया दिएका छन् ।
सबनिशले यस अघि नै मोदीको कडा आलोचना गर्दै आएका छन् ।
मोदीले अनुमति नलिइकन पाकिस्तान भ्रमण गरेको भन्दै मुद्धा
प्रधानमन्त्री नरेन्द्र मोदीले अकस्मात पाकिस्तानको लाहौर जाने निर्णय गरेपछि भारतमा उनको आलोचना भएको थियो । पाकिस्तानमा पनि उनको भ्रमणले तरंग ल्याएको छ ।
पाकिस्तानका एक वकिलले मोदीले अनुमति नलिइकन पाकिस्तान आएको भन्दै मुद्धा समेत हालेका छन् ।