१६ चैत, काठमाडौं ।
‘हत्याराका सरदार’ भन्दै नेपाल भ्रमणमा रहेका भारतीय स्थल सेनाध्यक्ष विपीन रावतलाई ज्ञापन पत्र बुझाइएको छ । ग्रेटर नेपाल राष्ट्रवादी मोर्चाले भारतीय राजदूतावास मार्फत स्थल सेनाध्यक्ष रावतलाई ज्ञापन पत्र पठाएको हो ।
राजदूतावासको दर्ता नं. ९ रहेको मोर्चाको तीन बुद्धे ज्ञापनपत्रमा गोविन्द गौतमको हत्याको लगत्तै नेपाल भ्रमण गरेकोमा स्थल सेनाध्याक्ष प्रति तीब्र रोष प्रकट गरिएको छ । मोर्चाका अध्यक्ष फणीन्द्र नेपालले भारतीय राजदूतावास पुगेर उक्त ज्ञापनपत्र बुझाएका हुन् ।
ज्ञापन पत्रमा नेपाल–भारत सम्बन्ध सौहार्दपूर्ण बनाउने भए सेनाध्यक्षले आफ्नो सरकारलाई सुगैली सन्धीमा गुमेको भूभाग नेपाललाई फिर्ता गर्ने, कालापानीबाट भारतीय सेना तत्काल फिर्ता गर्ने र भारतीय सिमा सुरक्षा बल एसएसबीले हत्या गरेका गोविन्द गौतम लगायत सबै नेपालीका परिवारलाई प्रति व्यक्ति कम्तीमा पचास लाख भारु क्षतिपूर्तिसंगै माफी माग्नु पर्ने माग सम्बोधन गर्न आग्रह गरिएको छ ।
