एजेन्सी।
चर्चित टिभी शो ‘बिग बोस’को १०औँ सिजनमा होस्ट गर्नको लागि बलिउड सुपरस्टार सलमान खानले आफ्नो शुल्क बढाएका छन्। सलमानले बिग बोसको नयाँ सिजनको लागि पछिल्लो सिजनको भन्दा ३०% बढि शुल्क लिने भएका छन्। यसलाई हिसाब गर्ने हो भने प्रत्येक एपिसोडको १० करोड भारु हुन जान्छ।
‘बिग बोस’को ९औँ सिजनमा सलमानले २६ एपिसोड होस्ट गरेका थिए र उनले एक एपिसोडको लागि करीब ८ करोड भारु लिएका थिए। यस हिसाबले पुरै सिजनबाट उनले करीब २०८ करोड भारुको कमाइ गरेका थिए।
सलमान खानले बिग बोसमा पहिलो चोटि चौथो सिजनमा होस्ट गरेका थिए। त्यतिबेला उनको शुल्क करीब २.५ करोड भारु प्रति एपिसोड रहेको थियो। यसपश्चात पाँचौँ र छैठौँ सिजनमा पनि उनले यति नै शुल्कमा काम गरेका थिए। यस हिसाबले पहिलो तीन सिजनमा उनको अनुमानित कमाई ६५ करोड प्रति सिजन थियो।
त्यसपछि ७औँ सिजनमा सलमानले आफ्नो शुल्क दोब्बर गरिदिएका थिए। यानिकी यस सिजनको लागि उनले करीब ५ करोड प्रति एपिसोड लिएका थिए। २६ एपिसोडबाट उनले अनुमानित १३० करोड भारु कमाइ गरेका थिए।
