१७ मंसिर, महोत्तरी । जबर्जस्ती बालविवाह गराउन खोज्नेलाई समाजनै लागेर रोकेको छ । बाल विवाह गराउन लागिएका पीडित वालिकालाई महोत्तरीको फुलकाहाबाट प्रहरीले उद्धार गरेको छ । 
फुलकाहा गाविस–९ जमुनियाका लक्ष्मण चौधरीका घरमा राखिएकी १४ वर्षीया आरतीकुमारी चौधरीलाई शुक्रबार साँझ प्रहरीको रोहबरमा उद्धार गरिएको हो । उद्धार गरिएका जोडी अहिले इलाका प्रहरी कार्यालय गौशालाको नियन्त्रणमा छन् ।घटनामा संलग्न अन्य व्यक्तिको सम्बन्धमा अनुसन्धान जारी रहेको प्रहरी निरीक्षक शम्भु पोखरेलले बताए ।
बाल संरक्षण तथा प्रवद्र्धन समिति भरतपुर, सामुदायिक परिवार कल्याण समाज महोत्तरी र प्रहरी तथा पत्रकार सम्मिलित एक टोलीले लक्ष्मणका घरमा राखिँदै आएकी उक्त किशोरीलाई उद्धार गर्न सफल भएको हो । लक्ष्मणका १६ वर्षीय छोरा कृष्णसँग प्रेम सम्बन्ध रहेको जनाउँदै जबर्जस्ती विवाह गराइदिने उद्देश्यले स्थानीय पञ्च कहलाउनेहरुले आफ्नो निगरानीमा एक महिनादेखि उनको घरमा आरतीलाई राख्दै आएका थिए ।
त्यस गाउँका भद्रभलाद्मीले यसअघि पनि बाल विवाह गराएर अभिभावकसँग भोजभतेरका नाममा हजारौँ रकम जरिवाना तिराउने गरेको बताइएको छ ।
