काठमाडौं ।
केही समयअघिदेखि मिडिया तथा फिल्मकर्मबाट टाढा रहँदै आएकी अभिनेत्री सुमिना घिमिरेले गुपचुपमा बिहे गरेकी छन् । उनले सोमबार राजधानीको एक व्यांङकेटमा काभ्रेका रोशन सापकोटासँग हिन्दू संस्कारअनुसार बिहे गरेकी हुन् ।
सुमिना र रोशनको केही समयअघि म्युजिक भिडियोमा अभिनय गर्ने क्रममा चिनजान हुँदै अफेयर चलेको थियो । कान्छा बताइने रोशन पेसाले विमानचालक हुन् ।
ज्ञानेन्द्र देउजाको निर्देशनमा बनेको ‘छविलाल कन्जुस छैन’ फिल्ममार्फत अभिनयमा उत्रिएकी सुर्खेतकी मीनालाई दुलही फिल्मले हिरोइन सुमिनाका रुपमा चिनाएको हो । आजको नयाँ पत्रिकामा खबर छ ।
त्यसपछि उनले करिब दुई दर्जन फिल्ममा अभिनय गरिन् । तर,उनी अभिनित अधिकांश फिल्म असफल भएका छन् । हाल उनी अभिनित भिमदत्त प्रदर्शन भइरहेको छ भने अहिलेसम्मको उनको पछिल्लो फिल्म माला ६ चैतमा रिलिज हुँदै छ ।
