४ माघ, काठमाडौं ।
नेपाल विद्युत् प्राधिकरण र चाइना थ्री गर्जेज इन्टरनेसनल कर्पोरेसनबीच ७ सय ५० मेगावाटको पश्चिम सेती जलविद्युत् आयोजना निर्माण गर्ने संयुक्त लगानी सम्झौता (जेभिए)मा प्रारम्भिक हस्ताक्षर भएको छ । तीन दिनभन्दा लामो छलफलपछि सोमबार प्राधिकरणका कार्यकारी निर्देशक कुलमान घिसिङ र चाइना थ्री गर्जेज इन्टरनेसनल कर्पोरेसनका उपाध्यक्ष या याङले सम्झौतामा प्रारम्भिक हस्ताक्षर गरेका हुन् ।
प्राधिकरण र कम्पनीको सञ्चालक समिति (बोर्ड)ले पारित गरेपछि जेभिएमा हस्ताक्षर हुने लगानी बोर्डका सहसचिव मधुप्रसाद भेटुवालले जानकारी दिए । ‘प्रारम्भिक हस्ताक्षरपछि आयोजना अगाडि बढाउन एउटा खुड्किलो पार भएको छ,’ उनले भने, ‘दुवै संस्थाका बोर्डबाट पारित भएपछि जेभिएमा हस्ताक्षर हुनेछ ।’
साउन ०७१ बाट निर्माण सुरु गरी पुस दोस्रो साता ०७६ मा आयोजनाको निर्माण सम्पन्न गर्ने लक्ष्य राखी ऊर्जा मन्त्रालय र चाइना थ्री गर्जेज इन्टरनेसनल कर्पोरेसनबीच १७ फागुन ०६८ मा समझदारी भएको थियो । तर, समझदारी भएको ५ वर्ष पुग्न लाग्दासमेत अहिलेसम्म आयोजना निर्माण गर्ने कम्पनी नै खुल्न सकेको छैन । अस्ट्रेलियन कम्पनी स्मेकले पनि आयोजना १५ वर्ष ओगटेको थियो । आजको नयाँ पत्रिकामा खबर छ ।