काठमाडौ ।
छ महिनासम्म भारतले गरेको नाकाबन्दीको राप र ताप लिएर प्रधानमन्त्री केपी ओली छ दिन भारत भ्रमणमा गए । भारत भ्रमणमा ओलीको स्वागत सम्मान राम्रो रह्यो । भारत भ्रमणको प्रमुख उदेश्य थियो नेपाल र भारतको बीचमा देखिएको असमझदारी हटाउनु ।
भारत भ्रमणको क्रममा प्रधानमन्त्री ओली र भारतीय प्रधानमन्त्री नरेन्द्र मोदीबीच चालिस मिनेट, दुई जनाको बीचमा मात्र कुराकानी भयो । कुराकानी फलदायी हुन नसकेको कुरा प्रधानमन्त्री अोलीले नै स्वीकार गरिसकेका छन् ।
ओलीको सय चोट मोदीको एकै चोट
भारत भ्रमणमा जानु अघि प्रधानमन्त्री ओलीले ठूलै घर सल्लाह गरे । प्रमुख दलका नेताहरुसंग छलफल गरे संसदमा सुझाव मागे । कुटनीतिक क्षेत्रका विज्ञसंग सुझाव मागे । जम्बो लाबालस्कर लिएर ओली भारत भ्रमणमा गए ।
ओलीले सोचे अनुसार भ्रमण फलदायी भएन । भ्रमणको क्रममा भारतले दिएको आतिथ्यता स्वागत संस्कारमा ओली दंग परे । मख्ख भए । ओलीले नै भने मलाई भारतले राजकीय सम्मान दियो । ओली र मोदीबीच छुट्टाछुट्टै कुराकानी भयो । संयुक्त रुपमा छलफल भयो । ओलीको जन्म दिनमा मोदीले पुष्प गुच्छा पठाए । स्वागत र सत्कार भरिपूर्ण रर्यो ।
तर सुनारको सय चोट लोहारको एकै चोट भनेझै प्रधानमन्त्री मोदीले नेपालको संविधान राम्रो भएपनि यसको सफल कार्यान्वयन संवाद र सहमतिमा निर्भर रहने भाषण दिए । जसले गर्दा ओलीको सय चोटी वेकामे बन्यो । छ दिनको बीचमा दुई देशका राष्ट्र प्रमुखबाट संयुक्त विज्ञप्ती आउने आशा र अपेक्षा गरेपनि विज्ञप्ती आउन सकेन र ओली जस्तो गएका थिए त्यस्तै नेपाल फर्किए। खासै उल्लेखिय सफलता हात पार्न सकेका छैनन् ।
ओलीले भारत जानु अघि भनेका थिए–मेरो कुनै एजेण्डा छैन, म भारत जान्छु भ्रमण गर्छु भारतलाई त्यही छोडेर नेपाल फर्कन्छु ।’
प्रचण्डको निष्कर्ष ओलीको भ्रमणले काम गरेन
सत्ता साझेदार एमाओवादीका अध्यक्ष प्रचण्डले ओलीको भारत भ्रमण पूर्ण रुपमा असफल भएको बताएका छन् । उनले भारत भ्रमणको बीचमा जसरी सफलता पाउनु पर्ने हो भ्रमणले उपलब्धिमूलक हुन नसकेको आफू निकट नेताहरुसंग भनेका छन् ।
उनले निकै ठूलो आशा गरिएपछि कुरा नबुझनु र कुरा राख्न नसक्नु विभिन्न कारणले भ्रमण फलदायी हुन नसकेको बताउने गरेका छन् । गृह मन्त्री वस्नेतले पनि प्रचण्डलाई भ्रमण फलदायी बन्न नसकेको सुनाएको बताइएको छ । संविधान जारी भएपछि बढेको असमझदारी हटाउन भारत अझै स्पष्ट हुन चाहेन जसको कारणले अझै पनि आशंका गर्ने ठाउं रहेको निष्कर्ष वस्नेताले प्रचण्डलाई सुनाएको एक नेताले बताए ।