एजेन्सी।
प्रविधिको बजारमा धमाधम नयाँ-नयाँ स्मार्टफोनहरूको ओइरो लाग्ने क्रममा प्रविधिकै विशाल कम्पनी एप्पलको नयाँ आइफोन ७ प्लसको तस्विर लिक भएको छ। लिक भएको तस्विरले फोनमा भएको सबैभन्दा ठूलो विशेषताको बारेमा सुनिश्चित गरेको छ।
नयाँ आइफोनका तस्विरहरू चीनका फोरम वेबसाइटहरूमा भाइरल हुन गएको छ तर यसको बारेमा कुनै आधिकारिक पुष्टि भने हुन सकेको छैन।
आइफोन ७-प्लस वा आइफोन ७-प्रो का तस्विहरूमा पहिलेको भन्दा अलि लामो क्यामेरा स्लट देख्न सकिन्छ, जसले डुअल-क्यामेरा लेन्स भएको सङ्केत गर्दछ। यो भन्दा पहिले पनि आइफोन ७-प्लसको गोप्य क्यामेरा प्रोजेक्टको बारेमा खुलासा भएको खबर आएको थियो। सो खबरका अनुसार एप्पल कम्पनीले आफ्ना आइफोनहरूमा क्यामेराको गुणस्तरलाई नयाँ सिँढिमा उकाल्नको लागि डुअल-क्यामेराको खरीद गरेको थियो।
तर, यो डुअल क्यामेरा आइफोन ७-प्लसमा मात्रै राखिने हो कि त्योभन्दा सानो आइफोन ७ मा पनि राखिन्छ भन्ने कुरा प्रष्ट हुन सकेको छैन। खबरका अनुसार, यो प्रविधि आइफोनको विशेष भर्जन- आइफोन ७-प्रो मा मात्रै हुने, जुन आइफोन ७-प्लसकै अपग्रेडेड भर्जन भएको अनुमान गरिएको छ।
तस्विरमा आइफोन ७-प्लसको डिजाइन आइफोन ६ को जस्तै भएको तर त्यसको चार कुना अलि बढि घुमाउरो भएको देख्न सकिन्छ। साथै आइफोन ६ र ६-एसको पछाडि पट्टि भएको एण्टेना लाइन भनेको हटाइएको छ।
